Қазақстан АҚШ-пен 4,2 млрд долларлық келісімге қол қойды

Қазақстан АҚШ-тан локомотив пен теміржол жабдығын сатып алу жөнінде жалпы құны 4,2 млрд доллар болатын келісімге қол қойды. Бұл туралы 22 қыркүйекте АҚШ Сауда министрлігі хабарлады.

Құжатқа сәйкес, «Қазақстан темір жолы» АҚ Wabtec компаниясынан 300 жаңа локомотив алмақ. Сонымен қатар Қазақстанда техникалық тұрғыдан жетілдірілген локомотивтерді құрастыру және оларға сервистік қызмет көрсету қарастырылған. Мұны Ақорда да растады.

📌 Ақорданың мәліметінше:

• Астанада 2009 жылдан бері Wabtec Kazakhstan зауыты жұмыс істейді;

• Компания өндіріс орнына 230 млн доллардан астам инвестиция құйған;

• Осы уақытқа дейін «ҚТЖ» мен экспортқа арналған 600-ден астам локомотив құрастырылған;

• Өндірістің локализация деңгейі 45 пайызға жетті.

АҚШ Сауда министрі Говард Латник келісімді «Америка мен Орталық Азия арасындағы тарихи әріптестік» деп атап, оның арқасында АҚШ-та жаңа жұмыс орындары ашылатынын және ынтымақтастық мүмкіндіктері кеңейетінін жеткізді.

21 қыркүйек кешінде Қазақстан президенті Қасым-Жомарт Тоқаев АҚШ президенті Дональд Трамппен телефон арқылы сөйлесті. Бұдан соң Трамп Truth Social желісінде арнайы жазба жариялап, келісімді «теміржол саласын қолдауға бағытталған тарихи қадам» деп бағалады.

«Мен Қазақстанның аса құрметті президенті Қасым-Жомарт Кемелұлы Тоқаевпен тамаша әңгімені аяқтадым. Олар теміржол жабдығын сатып алу бойынша тарихтағы ең ірі келісімге қол қойды – құны 4 миллиард доллар тұратын америкалық локомотивтер мен теміржол жабдықтары. Бізге АҚШ теміржол индустриясын қолдау қажет, себебі ол жылдар бойы жалған экологтардың шабуылына ұшырап келеді. Президент Тоқаевты осы ірі келісіммен құттықтаймын. Бұл ел де, бүкіл әлем де біздің сенімді әрі әдемі теміржолдарымыздың негізінде құрылды. Енді олар тез арада қайта оралады!», – деп жазды ол.