Қазақстан АЭС салу үшін шетелдік банктерден қарыз алуы мүмкін

Қазақстандағы атом электр станциясын шетелдік экспорттық-несиелік агенттіктер қаржыландыруы мүмкін. Бұл туралы Ұлттық экономика вице-министрі Арман Қасенов мәлімдеді.

Оның айтуынша, АЭС-ті қандай қаражат есебінен салатыны әлі белгісіз. Алдымен жобаның өзі, қолданылатын технологиялар, тек содан кейін барып оның құны анықталады.

"Егер құрылыс кезінде шетелдік жабдық пайдаланылса, оны қаржыландыру үшін экспорттық-несиелік агенттіктердің қаражатын тартуға болады. Мысалы, Қытайдан жабдық сатып алсаңыз, оны қаржыландыруды Қытайдың Эксимбанкі ұсынуы мүмкін. Германияда – Hermes агенттігі, АҚШ-та – Эксимбанк АҚШ және тағы басқа агенттіктер бар. Олар әлеуетті қаржы көздерінің бірі бола алады", – деді Қасенов үкімет кулуарында.

Сонымен қатар халықаралық даму институттары да жобаны қаржыландыруы мүмкін. Вице-министрдің айтуынша, энергетика саласындағы жобалар инвесторлар үшін өте тартымды.

"Неге? Өйткені бұл салада өндірілетін өнімнің көлемі алдын ала болжанған. Яғни сату проблемалары өте аз. Сондай-ақ тарифтердің қалыптасу механизмі де бірнеше жылға есептелген. Сондықтан әлемде энергетика және коммуналдық шаруашылық жобалары төмен тәуекелді болып саналады. Бұл жобаның қаржыландыру көзі табылатынына және оның тиімді шарттармен қамтамасыз етілетініне ешқандай күмән жоқ", – деді Қасенов.