Қазақстан 2029 жылғы қысқы Азиаданы өткізеді

Қазақстан 2029 жылы өтетін қысқы Азия ойындарының (Азиада) қожайыны атанады. Бұл туралы Қытайдың «Синьхуа» агенттігі Азия Олимпиадалық кеңесіне сілтеме жасап хабарлады. Ресми келісімшартқа 5 ақпанда Милан қаласында қол қойылады.

Бастапқыда қысқы Азиаданы Сауд Арабиясында салынып жатқан Неом қаласы қабылдауы тиіс болған. Алайда өткен аптада Сауд Арабиясы үкіметі құрылыс жұмыстарының кешеуілдеуіне байланысты ойындарды кейінге шегеретінін мәлімдеген.

Қазақстан үшін бұл – қысқы Азиаданы қабылдаудағы екінші тәжірибе. 2011 жылы Алматы мен Астана қысқы Азия ойындарын бірлесіп өткізген. Кейін Алматы 2017 жылғы Қысқы Универсиадаға арнап ірі спорттық инфрақұрылым салды. Сондай-ақ қала 2022 жылғы қысқы Олимпиаданы өткізуге үміткер болғанымен, шешуші кезеңде Бейжіңге жол берген еді.

Айта кетейік, 2025 жылы Қытайдың Харбин қаласында өткен Қысқы Азия ойындарында Қазақстан құрамасы 4 алтын, 9 күміс және 7 қола медаль жеңіп алып, жалпыкомандалық есепте төртінші орынға тұрақтаған.