Қазақстан 2028 жылға дейін азық-түлік бойынша толық тәуелсіз болуды көздеп отыр

Қазақстан 2028 жылға қарай негізгі азық-түлік өнімдерін – ет, сүт, жұмыртқа, көкөніс пен ұнды толықтай өз ішінде өндіріп, импортқа тәуелділікті азайтуды жоспарлап отыр. Бұл туралы Үкіметтегі кеңесте айтылды.

🌾 Егіс алқабы артты

Биыл егістік көлемі 23,6 млн гектарға жетті. Дәнді дақылдар азайғанымен, майлы дақылдар мен картоптың көлемі көбейді. Бұл халықты әлеуметтік маңызы бар өнімдермен көбірек қамтамасыз етуге мүмкіндік береді.

🐄 Мал басы көбейді

2025 жылдың алғашқы жартысында:

• ірі қара – 8,8 млн басқа жетті (+8,3%),

• қой мен ешкі – 21,5 млн (+0,8%),

• жылқы – 4,6 млн (+4,7%),

• құс – 47,7 млн (+2,7%).

Соның арқасында ет, сүт, жұмыртқа өндірісі де өсті.

🥛 Сүт пен құс еті бойынша жобалар

Соңғы жылдары 17 құс фабрикасы ашылып, елдегі құс етімен қамтамасыз ету деңгейі 67%-дан 79%-ға көтерілді. 2028 жылға дейін тағы 41 фабрика іске қосылып, бұл бағытта толық тәуелсіздікке қол жеткізіледі.

Сүт өндірісінде де серпін бар: қазір 69 сүт фермасы жұмыс істеп тұр, тағы 47-сі салынып жатыр. Барлығы іске қосылған соң жылына қосымша 600 мың тонна сүт өндіріліп, ірімшік пен сүзбе тапшылығы жойылады.

Дегенмен оның айтуынша, құс еті, шұжық, ірімшік, қант және балық бойынша импорт бар.

🛒 Баға мәселесі

Сауда министрлігінің дерегінше, әлеуметтік маңызы бар азық-түлік бағасының өсу қарқыны бәсеңдеген. Шілде айында баға небәрі 0,4%-ға, ал тамыздың алғашқы екі аптасында 0,1%-ға ғана өскен. Кейбір негізгі өнімдер – күнбағыс майы, жұмыртқа, ұн, көкөніс – Қазақстанда ЕАЭО елдерінің ішінде ең арзан болып тұр.