Қазақстан 2027 жылы еурокубок финалын өткізуге өтінім берді

Қазақстан футбол федерациясы (ҚФФ) УЕФА Конференция лигасы немесе УЕФА Суперкубогының 2027 жылғы финалын өткізу үшін ресми түрде өтінім берді. Бұл туралы ҚФФ президенті Марат Омаров Qazsport телеарнасына берген сұхбатында мәлімдеді.

Оның айтуынша, УЕФА президенті Александер Чефериннің Қазақстанға алғашқы ресми сапары және ұйым тарапынан көрсетілген қолдау еліміздің футбол инфрақұрылымын дамыту мен ірі халықаралық турнирлерді өткізуге үлкен мүмкіндік ашып отыр.

«Александер Чеферин алғаш рет Қазақстанға ресми сапармен келіп, Мемлекет басшысы Қасым-Жомарт Тоқаевпен кездесті. Біз футболды дамыту жайында мазмұнды әрі терең әңгіме жүргіздік. УЕФА-мен күнделікті тығыз жұмыс істейміз. Бұл біздің әдістемелік және инфрақұрылымдық жобаларымызға қолдау білдіретін негізгі серіктесіміз. VAR жүйесі сияқты заманауи жобалар соның дәлелі. УЕФА бізге жыл сайын қаржылай қолдау көрсетеді», – деді Марат Омаров.

Федерация басшысы еліміз 2027 жылы УЕФА Конгресін де қабылдауға дайын екенін айтты. Сонымен қатар финалды өткізу үшін Астана немесе Алматы қалалары қарастырылып жатқанын жеткізді.

Қазіргі таңда жаңа стадиондар салу жұмыстары жүріп жатыр. Сондай-ақ Қазақстанда U-21 және U-19 жасөспірімдер арасындағы Еуропа чемпионаттарын өткізу жоспары бар.