«Қазақмыстың» иесі ауысты

Қазақстандағы ірі өндірістік корпорациялардың бірі – «Қазақмыс» компаниясының иесі ауысты. Forbes басылымының хабарлауынша, корпорацияның жаңа иесі Qazaq Stroy компаниясының бенефициары Нұрлан Артықбаев болған.

Qazaq Stroy өкілдері мәміленің жабылғанын растағанымен, оның шарттары мен құны туралы мәлімет берілмеді. Сондай-ақ «Қазақмыс» та, Qazaq Stroy де бұл келісімге қатысты ресми хабарлама таратпаған.

Forbes-ке берген түсініктемесінде Qazaq Stroy өкілдері «Қазақмысты» дамыту жоспарлары бар екенін айтқан. Атап айтқанда, корпорация кәсіпорындарын қажетті шикізат қорымен қамтамасыз ету үшін геологиялық барлау жұмыстарын едәуір кеңейту көзделіп отыр.

Айта кетейік, мыс өндірумен және өңдеумен айналысатын «Қазақмыс» компаниясы желтоқсан айының басында сату жөнінде келіссөздер жүргізіліп жатқанын растаған еді. Ол кезде мәміленің егжей-тегжейі жарияланған жоқ. Бұған дейін компанияның 70 пайызы Владимир Кимге, 30 пайызы Эдуард Огайға тиесілі болған.

Владимир Ким ірі өндірістік Kaz Minerals корпорациясының негізгі акционері ретінде қала береді.

Forbes Kazakhstan нұсқасы бойынша, «Қазақмыс» – Қазақстандағы көлемі жағынан екінші ірі жекеменшік компания. Владимир Ким Forbes тізімінде елдегі ең бай кәсіпкерлердің алғашқы үштігіне енсе, Эдуард Огай да ауқатты бизнес өкілдерінің қатарында.

Нұрлан Артықбаев – Qazaq Stroy компаниялар тобының негізін қалаушы және негізгі акционері. Forbes Kazakhstan журналының мәліметінше, ол Қазақстандағы ең бай 75 кәсіпкердің ішінде 44-орында тұр, байлығы 2025 жылғы мамырдағы бағалау бойынша 228 млн долларды құрайды. Артықбаев Telecom Systems Ltd. арқылы «Қазақтелеком» компаниясының 9,84 пайыз акциясына иелік етеді. 2025 жылғы қарашаның ортасында ол «Ақтөбе» футбол клубының инвесторы атанған.

Qazaq Stroy компаниялар тобы 2003 жылдан бері жұмыс істейді. Алғашында тұрғын үй құрылысы саласында қызметін бастаған холдинг бүгінде ақпараттық-коммуникациялық технологиялар, мұнай-газ химиясы, тау-кен өндірісі, агрохимия және өзге де салаларда жобалар жүзеге асырып келеді.

«Қазақмыс» корпорациясы мыс кенін өндірумен, катодты мыс пен мыс катанкасын шығарумен, бағалы металдарды аффинаждаумен және оларды сатумен айналысады. Компанияның негізгі тұтынушылары – Қытай мен Түркия нарықтары, ал өндірілетін алтынның барлығын Қазақстанның Ұлттық банкі сатып алады. Корпорацияның кеніштері, байыту фабрикалары, көмір разрездері мен мыс балқыту зауыттары Қарағанды, Ұлытау, Жамбыл және Абай облыстарында орналасқан.