Қазақ жігіті Британияда мэр болып сайланды

Қазақстан тумасы Санжар Әбішев Лондондағы Сент-Джеймс ауданының мэрі болып сайланды. Ол Ұлыбританияның Консервативтік партиясы атынан түсіп, қарсыласынан 350 дауыс артық жинаған.

Бұл туралы кәсіпкер Қанат Көпбаев әлеуметтік желідегі парақшасында хабарлады. Санжар – қазақстандық кәсіпкер Азат Әбішевтің ұлы болуы мүмкін.

Санжар Әбішев Malvern College білім орнында оқып, кейін Ұлыбританияда жоғары білім алған. Әр жылдары маркетинг саласында жұмыс істеп, 2016 жылдан бастап Blue Swallow Group атты жеке агенттігін дамытып келеді. Сонымен қатар 2015 жылы әлеуметтік жобаларды қолдауға бағытталған қайырымдылық қорын құрған.

Ол саясатқа 2022 жылдан бері қатысып келеді. 2024 жылы Сент-Джеймс округіндегі Консервативтік партия бөлімшесінің төрағасы болған. Сайлауалды кезеңде аудан тұрғындарымен белсенді кездесулер өткізіп, қоғамдық жұмыстарға араласқан.

Сайлау науқаны кезінде ол жарақат алып, бірнеше күн пәтерінде жатқан 79 жастағы ер адамды құтқарып қалғаны да белгілі болды.