Қаза тапқан әскерилердің отбасыларына көмектескісі келетіндер үшін ресми шот ашылды

Маңғыстау облысының әкімдігі Каспийдегі әскери оқу-жаттығу кезінде қаза тапқан әскери қызметшілердің отбасыларына қосымша материалдық көмек жинайтын бірыңғай қордың деректемелерін жариялады.

Әкімдіктің мәліметінше, қаза тапқандардың отбасыларына көмектескісі келетін азаматтардан, кәсіпкерлер мен ұйымдардан көптеген өтініш түскен. Осыған байланысты қаражат жинауды бір арнаға түсіріп, алаяқтықтың алдын алу үшін бірыңғай ресми тетік белгіленді.

Көмек жинайтын бірыңғай оператор ретінде «Ұлттық рух» қоғамдық бірлестігі белгіленген. Қорға түскен қаражат тек қаза тапқан әскери қызметшілердің отбасыларына көмек көрсетуге жұмсалады. Әкімдік қаражаттың жұмсалуы мемлекеттік және құқық қорғау органдарының бақылауында болатынын мәлімдеді.

Қазірдің өзінде Қазақстан Халық Кеңесінің мүшелері 815 млн теңге материалдық көмек жинаған.

Әкімдік алаяқтардан сақ болуға шақырып, қаза тапқандардың отбасыларына көмектескісі келетін азаматтарға ақшаны жеке адамдардың банк карталарына, шоттарына немесе белгісіз деректемелерге аудармауды ескертті.

Ресми деректемелер:

«Ұлттық рух» қоғамдық бірлестігі
БСН: 090140013447
Банк: «Alatau City Bank» АҚ
БСК: TSESKZKA
ЖСК: KZ03998PTB0000488655
Валюта: теңге (KZT)

Еске салайық, 24 қыркүйекте Каспий теңізіндегі әскери оқу-жаттығу кезінде 17 әскери қызметшіні ашық теңізге алып кеткен. Үш әскери қызметші құтқарылып, 14 адам қаза тапты. 25 қыркүйек Қазақстанда жалпыұлттық аза тұту күні болып жарияланды.