Қайырымдылыққа деп жиналған 2 млрд теңге басқа мақсаттарға жұмсалған – депутат

Мәжіліс депутаты Динара Наумова қайырымдылық ұйымдарының жұмысын заңмен реттеуді ұсынды.

"Елімізде мұқтаж жандарға шынайы жанашырлықпен көмек көрсетуге дайын көптеген қайырымдылық және еріктілер ұйымы жұмыс істейді. Алайда олардың лайықты беделін қоғамның сенімін асыра пайдаланатын және тек жеке басының пайдасын көздейтін алаяқтар түсіреді", – дейді ол.

Депутат Қаржы мониторингі агенттігінің деректерін келтірді. Агенттіктің биылғы наурыз айындағы деректеріне сәйкес, 138 банк картасы түрлі мақсаттарға күмәнді алымдарға тартылған, ал 70 мыңнан астам қазақстандық өз ақшаларын жалған көмекке жіберді. 

Алымдардың жалпы сомасы 6 млрд теңге болды, оның 2 млрдында алаяқтық белгілері бар.

"Алақолдар жиналған қаражатты әртүрлі мүліктерді сатып алуға, тұрмыстық қажеттіліктерге, букмекерлік кеңселердегі ставкаларға, шетелдегі сәнді пәтерлерді жалға алуға және басқа да мақсатта пайдаланған. Бұл тек ресми деректер ғана. Анықталмаған алаяқтық фактілердің нақты саны айтарлықтай жоғары болуы мүмкін. Әр түрлі платформаларда қаржылай көмек сұрайтындар санының артуы байқалады. Алайда, осы қарқынмен бірге қоғамның игі ниетін теріс пиғылда пайдаланатын алаяқтардың қызметіне қатысты алаңдаушылық туындайды.  Бұл адамдар өзгелердің аяушылық сезімін оятып, қаржылай көмек жолдауы үшін қолдарынан келгенше түрлі амал-тәсілді қолданады", – деді Динара Наумова.

Respublica партиясының өкілі бірыңғай реттеуші органның, осы саладағы ашықтық пен есептілік мәдениетінің жоқтығына, сондай-ақ заңнамалық реттеудің жеткіліксіздігіне алаңдаушылық білдірді.

Respublica партиясының фракциясы қайырымдылық ұйымдары мен еріктілерді бақылау мен қорғауды қамтамасыз ету, соның ішінде заңнамалық актілерге өзгерістер енгізу, бірыңғай реттеуші орган құру және тиімді мониторинг жүргізу үшін онлайн-платформа құру шараларын қарастыруды ұсынады.