Қайтарылған әр теңге халық игілігіне жұмсалуы тиіс – Берік Асылов

Бас прокурор Берік Асылов қайтарылған заңсыз активтер есебінен Шымкент қаласында ерекше білім беру қажеттіліктері бар балаларға арналған жаңа жатақхана ашылғанын мәлімдеді.

Оның айтуынша, заңсыз шығарылған активтерді қайтару туралы есептердегі әрбір қаражат нақты әлеуметтік жобаларға бағытталып жатыр. Соның бір дәлелі – Шымкентте пайдалануға берілген жаңа жатақхана.

Бұған дейін мектеп-интернат тәрбиеленушілері 1975 жылы салынған ескі ғимаратта тұрған. Нормасы 125 орын болғанымен, онда 290 бала тұрған, инфрақұрылым әбден тозған.

Жаңа жатақхана 300 орынға арналған. Ғимараттың жалпы ауданы 8288,7 шаршы метрді құрайды. 3,5 гектар аумақта футбол алаңы, воркаут аймағы, ойын алаңдары және демалыс аймақтары салынған.

Ғимарат ішінде ұлдар мен қыздарға арналған бөлек тұрғын блоктар, медициналық бөлім, ойын бөлмелері және басқа да қажетті бөлмелер қарастырылған.

Бұл жобаға Мемлекет басшысының тапсырмасымен Арнаулы мемлекеттік қордан 2,6 млрд теңге бөлінген. Бұл қорда қайтарылған активтер мен қайтарылған мүлікті сатудан түскен қаражат жиналады.

Бас прокуратура мәліметінше, қайтарылған қаражат есебінен ел бойынша 500 млрд теңгеге жуық сомаға 440 әлеуметтік және коммуналдық нысанның құрылысы қаржыландырылған. Оның ішінде 319 нысан – мектептер, ауруханалар және су жүйелері – пайдалануға берілген.

Бас прокурордың айтуынша, қайтарылған әрбір теңге Қазақстан азаматтарының игілігіне жұмыс істеуі тиіс.