Қайсар Қамза Вьетнамнан Қазақстанға жеткізілмек

Халықаралық іздеуде жүрген қазақстандық блогер Қайсар Қамза Вьетнамнан Қазақстанға экстрадицияланып бара жатқан болуы мүмкін. Журналист Михаил Козачковтың мәліметінше, оқырмандары Камрань әуежайынан түсірілген суреттерді жолдаған. Онда блогердің жанында Қаржылық мониторинг агенттігінің қызметкеріне ұқсас адам тұрғаны байқалады.

Қайсар Қамза 2026 жылдың қаңтарында халықаралық іздеуге жарияланған болатын. Ол Instagram желісінде екі миллионнан астам оқырман жинап, кейін Қазақстанда тыйым салынған онлайн-казиноны жарнамалаған деген күдікке ілінген.

Тергеу нұсқасына сәйкес, блогер лицензиясы бар букмекерлік кеңсе ретінде жұмыс істеген Pin-Up бренді арқылы ойыншыларды рулетка мен басқа да тыйым салынған құмар ойындарға бағыттайтын схеманы жарнамалаған. Осы қызметі үшін ірі көлемде сыйақы алған. Тергеу барысында одан шамамен 200 мың АҚШ долларына тең криптовалюта анықталған.

Қылмыстық схема әшкереленгеннен кейін Қайсар Қамза Оңтүстік-Шығыс Азияға кеткен. Биыл сәуірде Вьетнамның Камрань қаласында Қазақстан Бас прокуратурасының сұрауы бойынша ұсталған.

Мамыр айында блогер Вьетнамнан видео жариялап, қамауға алынбағанын, тек көші-қон қызметі төлқұжатын алып қойғанын айтқан еді. Алайда қазір әлеуметтік желіде тараған жаңа суреттер оның Қазақстанға жеткізіліп бара жатқан болуы мүмкін екенін көрсетеді. Ресми органдар әзірге бұл ақпаратқа түсініктеме берген жоқ.