«Қайрат» ойыншыларына білім гранты табысталды

Қазақ спорт және туризм академиясының президенті Қайрат Закирьянов «Қайрат» футбол клубының бірқатар ойыншысына ректор грантын салтанатты түрде табыстады. Бұл туралы академияның баспасөз қызметі хабарлады.

Арнайы ұйымдастырылған кездесуде грант сертификаттары қақпашы Темірлан Анарбеков, жартылай қорғаушы Олжас Байбек және шабуылшы Мансұр Бірқұрмановқа табыс етілді. Академия басшылығы жас спортшылардың болашағына сенім білдіріп, бұл бастаманың жастарды қолдауға бағытталған мемлекеттік саясатпен үндес екенін атап өтті.

Академия өкілдерінің айтуынша, спортта да, білімде де жоғары нәтиже көрсетіп жүрген студенттерге қолдау көрсету тұрақты түрде жалғасады. Бұл – дарынды жастарды ынталандыруға бағытталған жүйелі жұмыстың бір бөлігі.

Айта кетейік, бұған дейін дәл осындай ректор гранты Шерхан Қалмұрзаға да табысталған болатын. Қазақ спорт және туризм академиясы талай саңлақ спортшыларды тәрбиелеген білім ордасы ретінде білім мен спортты қатар дамытуға басымдық беріп келеді.