«Қайрат» «Омонияны» жеңіп, Чемпиондар лигасының үшінші іріктеу кезеңіне өтті

Алматылық «Қайрат» Чемпиондар лигасының екінші іріктеу кезеңінде Кипрдің «Омония» клубын пенальти сериясында жеңіп, жарыстың үшінші іріктеу кезеңіне шықты.

Алматыдағы Орталық стадионда өткен қарымта кездесудің негізгі және қосымша уақыты алаң иелерінің 1:0 есебіндегі жеңісімен аяқталды. Матчтағы жалғыз голды 37-минутта Эдмилсон соқты. Екі ойын қорытындысы бойынша есеп теңескендіктен (1:1), жеңімпаз пенальти сериясында анықталды.

Он бір метрлік айып соққыларында Эдмилсон, Оксанен, Мартынович, Гуаль, Тұяқбаев және Бірқұрманов өз мүмкіндіктерін сәтті пайдаланды. Қақпашы Анарбеков қарсыластың екі соққысын қайтарып, «Қайраттың» 6:5 есебімен жеңіске жетуіне және келесі кезеңге өтуіне үлес қосты.

«Қайрат» бұған дейін бірінші іріктеу кезеңінде Черногорияның «Сутьеска» клубын екі матчтың қорытындысы бойынша 4:1 есебімен жарыс жолынан шығарған болатын. Ал үшінші іріктеу кезеңінде алматылық клуб Болгарияның «Левски» және Румынияның «Университатя Крайова» командалары арасындағы жұптың жеңімпазымен кездеседі.