«Қайрат» Чемпиондар лигасында рекордтық табысқа кенелді

Алматылық «Қайрат» Чемпиондар лигасының 2025-2026 жылғы маусымын Лондондағы «Эмирейтс» стадионында өткен драмалық матчпен аяқтады. Әлемдік деңгейдегі «Арсеналға» қарсы өткен кездесуде қазақстандық клуб нағыз мінез көрсетіп, 2:3 есебімен ғана жол берді. Тіпті соңғы минуттарда Рикардиньоның голынан кейін алматылықтар алпауыт клубтың үрейін ұшырып, сенсация жасауға бір қадам жетпей қалды, деп хабарлайды Sports.kz.

Жалпы кезеңде қазақстандық клуб сегіз матчта бір ұпай жинады. Алматылықтар Кипрдің «Пафос» клубымен тең ойнап (0:0), қалған жеті кездесуде жеңіліске ұшырады: Португалияның «Спортингінен» (1:4), Испанияның «Реалынан» (0:5), Италияның «Интерінен» (1:2), Данияның «Копенгагенінен» (2:3), Грекияның «Олимпиакосынан» (0:1), Бельгияның «Брюггесінен» (1:4) және Англияның «Арсеналынан» (2:3) ұтылды.

Чемпиондар лигасының негізгі кезеңіне шыққаны үшін «Қайрат» 18,62 миллион еуро (11,23 миллиард теңге) табыс тапты. Жалпы кезеңдегі тең ойын клубқа тағы 700 мың еуро (422,1 миллион теңге) әкелді. Осылайша, жалпы табыс көлемі 19,32 миллион еуроны (11,65 миллиард теңге) құрады.

 Еурокубоктық маусым аяқталғаннан кейін бұл сомаға телевизиялық және маркетингтік құқықтарды сатудан түсетін төлемдер қосылады. Еске сала кетейік, «Қайрат» Лондонда «Арсеналға» қарсы өткізген соңғы матчында сенсация жасауға жақын болып, тең есепті уысынан шығарып алды (3:2). Осымен «Қайрат» 2025-26 жылғы маусымдағы Чемпиондар лигасына қатысуын аяқтады және енді наурыз айында басталатын жаңа маусымға дайындалады.