Қайрат Балабиев Үкіметтен заңды деп берілген жерді "заңсыз" деп тануды тоқтатуды сұрады

Мәжіліс депутаты, «AMANAT» партиясы фракциясының мүшесі Қайрат Балабиев Үкіметке халықтың жер мен тұрғын үйге қатысты құқықтарын қорғауға бағытталған депутаттық сауал жолдады.

Депутат өз сауалында елдің түрлі өңірлерінде, әсіресе ірі қалаларда азаматтарға кезінде заңды түрде берілген жер телімдерінің кейін «заңсыз» деп танылып, мемлекет меншігіне қайтарылуы жиілегенін айтты. Оның айтуынша, мұндай жағдайлар көбіне бас жоспардың жиі өзгеруі немесе бюрократиялық түсінбеушіліктердің салдарынан туындайды.

«Көп жағдайда адамдар өз қаражатына үй салып, қоныстанып алған. Бірақ жаңа жоспар қабылданған соң, олардың құжаттары жарамсыз деп танылады да, үйлері “заңсыз құрылыс” болып шығады. Бұл тек құқықтық емес, әлеуметтік тұрақтылыққа да қауіп төндіретін мәселе», — деді депутат.

Балабиев Үкіметке бес нақты ұсыныс енгізді:

– Қалалар мен елді мекендердің бас жоспарларын бекіту және өзгерту тәртібін қайта қарау, негізсіз және жиі өзгерістерге жол бермеу;

–  Азаматтар зЗаңды берілген жер телімдерін «заңсыз» деп тануға тыйым салатын бірыңғай құқықтық нормалар қабылдау;

–  Жерді бақылаусыз немесе заңсыз бөлген лауазымды тұлғалардың жауапкершілігін күшейту;

–  Мемлекет немесе қоғам қажетіне алынған үйлер мен жерлер үшін өтемақы төлеу жүйесін жетілдіру;

–  Сотқа дейін шешу механизмдерін дамыту.