Қай өңірлерде ана мен нәресте өлім-жітімі жиіледі?

Қазақстанның алты өңірінде ана өлімі көрсеткіші едәуір өскен. Бұл туралы Денсаулық сақтау министрі Ақмарал Әлназарова Үкімет отырысында мәлімдеді.

Министрдің айтуынша, ана өлім-жітімі ең көп тіркелген өңірлер:

• Ақмола облысы;

• Жетісу облысы;

• Жамбыл облысы;

• Абай облысы;

• Ақтөбе облысы;

• Қостанай облысы.

Ең нашар көрсеткіш Ақмола облысында байқалған. Мұндағы өлім-жітім деңгейі республикалық орташа мәннен 7 есе жоғары. Ана өлімінің негізгі себептері – ауыр экстрагениталды аурулар (55,5%) және акушерлік асқынулар (45%).

Нәресте өлімі жиілеген өңірлер:

• Қызылорда облысы;

• Қостанай облысы;

• Батыс Қазақстан облысы;

• Жамбыл облысы;

• Абай облысы.

Жаңа туған нәрестелер өлімінің басты себептері – перинаталдық кезеңдегі асқынулар (47,7%), туа біткен даму ақаулары (19,6%) және тыныс алу ағзаларының аурулары (7,6%).

Сонымен қатар Павлодар, Солтүстік Қазақстан, Қостанай және Ұлытау облыстарында үйде болатын өлім-жітім көрсеткіші республикалық деңгейден 2 есе жоғары.

Ақмарал Әлназарова жергілікті атқарушы органдарға:

• кадр тапшылығын жою және мамандардың біліктілігін арттыру,

• медициналық ұйымдардың материалдық-техникалық базасын нығайту,

• жүкті әйелдер мен балаларды облыс орталықтарына жеткізу үшін көлікпен қамту,

• репродуктивті жастағы осал топтағы әйелдерді контрацепция құралдарымен қамтамасыз етуге қаржы бөлу жөнінде тапсырма берді.

Министрліктің мәліметінше, ана мен бала өліміне қатысты 44 медициналық ұйымға жоспардан тыс тексеру жүргізілген. Бұдан бөлек, Жамбыл және Ақмола облыстарында ауқымды тексерулер ұйымдастырылды.