Қай қалада арзан: Мегаполистердегі бензин бағасы белгілі болды

Қазақстанда жанармай бағасы өңірлер бойынша айтарлықтай айырмашылық көрсетіп отыр, деп хабарлады Kazenergy қауымдастығы. 20 сәуірдегі жағдай бойынша ең төмен баға Шымкентте тіркелсе, Астана мен Алматыда жанармай қымбат.

АИ-92 бензині Астанада литріне 237–238 теңгеден, Алматыда 237–240 теңгеден сатылып жатыр. Ал Шымкентте бұл отын түрі 221–226 теңге аралығында. Яғни айырмашылық шамамен 12–19 теңгені құрайды.

АИ-95 маркасы бойынша айырма одан да жоғары. Астанада баға 309–315 теңге, Алматыда 313–322 теңге, ал Шымкентте 297–305 теңге деңгейінде. Ең қымбат жанармай – АИ-98: Астанада 354–365 теңге, Алматыда 357–375 теңге, Шымкентте 345–359 теңге.

Дизель отыны үш қалада да салыстырмалы түрде тұрақты: Астанада 328–333 теңге, Алматыда 330–336 теңге, Шымкентте 325–334 теңге аралығында. Ал автогаз Астана мен Алматыда 112 теңге болса, Шымкентте 102 теңге.

Қауымдастық мәліметінше, баға айырмашылығы сақталғанымен, жанармай нарығы «басқарылатын» модель аясында қалып, күрт өсім байқалған жоқ.