Қауіпсіздік басты назарда: Алакөл туристік маусымға сақадай сай

Мемлекет басшысы Қасым-Жомарт Тоқаевтың 2026 жылды «Цифрландыру және жасанды интеллект жылы» деп жариялауы өңірлердегі технологиялық жобалардың қарқынын үдетті. Осы орайда, Абай облысының әкімі Берік Уәлидің төрағалығымен өткен алқалы жиында аймақтың байланыс жүйесін жақсарту және қоғамдық қауіпсіздікке заманауи технологияларды енгізу мәселелері талқыланды.

Биылғы туристік маусымның басты жаңалығы – Алакөл жағалауында орнатылған 224 интеллектуалды бейнекамера. Отандық мамандар әзірлеген бұл жүйенің ерекшелігі – жағажайдағы тәртіп пен қауіпсіздікті Семей қаласында отырып-ақ нақты уақыт режимінде қадағалауға мүмкіндік береді.

Жасанды интеллект негізінде жұмыс істейтін камералар құқық бұзушылықтарды танып, күдікті әрекеттер мен суық қаруды автоматты түрде анықтай алады. Сондай-ақ, бұл технология жоғалған адамдар мен заттарды санаулы минуттарда табуға септігін тигізуде. Маусым басталғалы «ақылды» жүйенің көмегімен 100-ден астам бала ата-анасымен қауышып, жоғалған құнды заттар иелеріне қайтарылды. Нәтижесінде жағалаудағы қылмыс деңгейі бірнеше есеге қысқарған. Сонымен қатар, туристердің жайлылығы үшін жағажайға алғаш рет оптикалық желі тартылып, 150-ден астам демалыс орны жылдам интернетке қосылды.

Өңірдегі интернет сапасын жақсарту жұмыстары да жүйелі сипат алған. Облыстағы 326 елді мекеннің 260-ы қазірдің өзінде сымды және мобильді желімен қамтылған. Сапалы байланысты одан әрі тарату мақсатында «Қазақтелеком» АҚ-мен бірлесіп, тағы 178 ауылға талшықты-оптикалық және спутниктік желі тарту жобасы қолға алынды. Жыл соңына дейін 86 елді мекен жаңа байланыс арнасына қосылмақ.

Бұған қоса, «Қолжетімді интернет» ұлттық жобасы аясында республикалық маңызы бар автожолдардың бойында желі сигналын күшейтетін 40 жаңа антенна орнату жоспарланып отыр. Қазіргі уақытта олардың 36-сы бойынша тиісті құжаттар дайындалып, сараптамадан сәтті өтті.

Цифрландыру тек инфрақұрылыммен шектелмей, білім беру саласына да серпін беруде. Семейдегі Оқушылар сарайында «Tomorrow School» жобасы сәтті іске асып жатса, енді 12–18 жас аралығындағы жасөспірімдерге арналған халықаралық «TUMO» цифрлық технологиялар орталығын ашу мәселесі пысықталуда. Жаңа білім ошағында өскелең ұрпақ жасанды интеллект, бағдарламалау, робототехника, 3D-модельдеу мен графикалық дизайн сияқты заманауи бағыттарды тегін меңгеруге мүмкіндік алады.

Жиын соңында аймақ басшысы Берік Уәли жаңа технологияларды енгізу облыстың әлеуметтік-экономикалық дамуына тікелей ықпал ететінін баса айтып, жауапты тұлғаларға жоспарланған жобаларды сапалы әрі мерзімінде орындауды тапсырды.