Кәуап пісіруге болмайды, қоқыс тастайтын жер жоқ: Бұқтырма демалыс маусымына дайын ба?

Шығыс Қазақстан облысы Алтай ауданындағы Бұқтырма су қоймасы маусым алдында тағы да ішкі туризмді тежейтін мәселелермен бетпе-бет келді. Kazinform хабарлағандай, демалыс базаларының иелері жыл сайынғы өзекті түйткілдерден әлі арыла алмай келеді.

Кәсіпкерлер әр жазда бір сұрақтарды қайта көтеруге мәжбүр: қоқысты қайда төгу керек, су қайдан алынады, өрт қауіпсіздігі талаптарын бұзбай қалай жұмыс істеуге болады және соның бәрімен қатар туристерді қалай тартамыз. Ал Палата жанындағы туризмді дамыту кеңесінің отырысы жүйенің әлі де дұрыс жұмыс істемейтінін көрсетті.

Кәсіпкерлердің айтуынша, жыл сайын маусым басталарда коммуналдық қызметпен келісімшарт жасалмай қалады. Ал Алтай ауданындағы "Тепловодоцентраль" КМК сұйық және қатты қалдықтарды қабылдауға дайын емес екенін мәлімдеді. Себебі дайындық жұмыстары әлі аяқталмаған.

«Кейбір демалыс орындары келісілген тәртіпті бұзып, сұйық қалдықтармен бірге пластик, бөтелке, гигиеналық құралдарды алып келеді. Бізде оларды сұрыптайтын маман да, мүмкіндік те жоқ», – дейді коммуналдықтар.

Кәсіпкерлер былтырғы жағдайды қайталамау үшін қалдықтарды қабылдау кестесін жасап, көліктерді тіркеуді және маусымдық жұмысшыларды субсидиялау арқылы тартуды ұсынды.

«Қоқыс карталарын кейін тазалағаннан гөрі, процесті басынан бақылау тиімді», – дейді кәсіпкерлер.

Аудан әкімдігі жаңа жоба қолға алынғанын айтып, тазарту нысандарының құрылысы жоспарланып жатқанын жеткізді. Алайда кәсіпкерлердің пікірінше, жобалар болашақ туристік ағымның артуын ескеріп жасалуы тиіс, себебі қазіргі қуат жеткіліксіз.

Полигон бұтақ, шөп және қураған өсімдіктерді қабылдамайды. Ал оларды өртеуге рұқсат жоқ.

«Базалар орман алқабында орналасқан. Құрылыс нысандарынан 50 метр қашықтықта ғана өртеуге болады. Мұндай мүмкіндік жоқ. Ал заң бұзылса, ӘҚБтК 410-бабы бойынша айыппұл қарастырылған», – дейді ТЖ басқармасы.

Туристер дәстүрлі демалыстан – мангал, қазан, от жағудан бас тартқысы келмейді. Бірақ арнайы жабдықталған орындар жетіспейді. Бұл да кәсіпкерлердің бас ауруына айналды.

Жыл сайын уәде беріліп, түрлі жиын өтсе де, нақты шешімдер баяу қабылданады. Ал жазғы маусым таяп қалды.

«Біз субсидия сұрап отырған жоқпыз. Бізге тек кедергі жасамай, маусымға дайындалуға мүмкіндік берсе болды. Әзірге әр жыл жүйемен күресумен өтеді», – дейді кәсіпкерлер.