Қатерлі ісіктің алғашқы белгілері: Онкологтар атаған 7 қауіпті симптом

Қазақ онкология және радиология ғылыми-зерттеу институтының мамандары қатерлі ісіктің алғашқы сатысында байқалатын жеті негізгі белгіні атап өтті. Дәрігерлердің пікірінше, бұл симптомдар міндетті түрде онкологиялық диагнозды білдірмейді, дегенмен олардың пайда болуы дереу медициналық тексерістен өтуді қажет етеді.

Назар аударуды талап ететін негізгі факторлар:

• Қан кету оқиғалары: Кез келген ағзадан (несеп, нәжіс, қақырық немесе сүт безі) түсініксіз қан бөлінуі – тексерілудің басты себебі.

• Дене салмағының себепсіз кемуі: Арнайы диетасыз немесе физикалық белсенділікті өзгертпей салмақ жоғалту қауіпті белгі болуы мүмкін.

• Созылмалы жөтел: Бір айдан астам уақыт басылмайтын жөтел, әсіресе оған ентігу мен әлсіздік қосылған жағдайда кәсіби тексеруді талап етеді.

• Денедегі жаңа түзілімдер: Сүт безінде, мойында немесе өзге де тіндерде пайда болған, ауыртпайтын тығыздалулар болса да, оны дәрігер қарауы тиіс.

• Меңдердің өзгеруі: Терідегі меңнің пішіні, түсі мен мөлшерінің өзгеруі, қышуы немесе қанауы дерматолог немесе онкологтың назарын қажет етеді.

• Дауыстың ұзақ қарлығуы: Суық тию белгілері болмаса да, екі-үш апта бойы қалпына келмеген дауыс – дәрігерге көрінудің бірден-бір себебі.

• Тұрақты ауырсыну: Емге көнбейтін, күшейе беретін немесе ұйқыны бұзатын түсініксіз ауырсыну сезімдеріне ерекше назар аударған жөн.

Медицина мамандары бұл белгілердің көбі басқа да аурулардың көрінісі болуы мүмкін екенін алға тартады. Уақтылы медициналық тексеру – ауруды ерте сатысында анықтаудың және емдеу нәтижесін жақсартудың ең тиімді жолы.

Еске сала кетейік, еліміздің онкологиялық орталықтарында тұрақты түрде саркома сынды қауіпті ауруларды ерте анықтауға арналған «Ашық есік» күндері өткізіліп тұрады.