Қасым-Жомарт Тоқаев Қауіпсіздік кеңесінің отырысын өткізді: Ғарыш саласын дамытудың басымдықтары белгіленді

Мемлекет басшысы Қасым-Жомарт Тоқаевтың төрағалығымен Қауіпсіздік кеңесінің отырысы өтті. Жиын барысында ғарыш саласының ағымдағы жай-күйі, жүзеге асырылып жатқан жобалар және оны одан әрі дамыту перспективалары талқыланды, деп хабарарлайды Ақорда баспасөз қызметі.

Президент ғарыш саласының стратегиялық маңызын атап өтіп, спутниктік байланыс пен ғарыштық инфрақұрылымның тұрақты жұмыс істеуін қамтамасыз ету қажеттігіне назар аударды.

Премьер-Министрдің орынбасары – Жасанды интеллект және цифрлық даму министрі Жаслан Мәдиев ғарыштық жобаларды іске асыру барысы туралы баяндады. Оның мәлімдеуінше, негізгі жұмыстар спутниктік жүйелерді дамытуға, инфрақұрылымды жетілдіруге және ғарыштық деректерді экономика мен мемлекеттік басқару жүйесінде тиімді қолдануға бағытталған.

Мемлекет басшысы жаһандық ғарыш секторындағы түбегейлі өзгерістерге тоқталды. Қасым-Жомарт Тоқаевтың айтуынша, ғарыш қызметі тек «жабық клуб» қатысушыларының үлесі болатын дәуір артта қалды. Бүгінде нарыққа байланыс, навигация, космомониторинг және интернетке қолжетімділікті қамтамасыз ету сынды қолданбалы бағыттарды дамытушы жекеменшік компаниялар келуде.

Отырыс барысында талқыланған өзге де негізгі мәселелер:

Ғарыш ғылымы: Астрофизика саласындағы ғылыми зерттеулерді қолдаудың маңыздылығы айтылды.

«Бәйтерек» жобасы: Аталған жобаның іске асырылуы ұлттық технологиялық және инженерлік әлеуетті нығайтудағы маңызды кезең ретінде оң бағаланды.

Халықаралық ынтымақтастық: Ресей Федерациясымен және басқа да шетелдік серіктестермен стратегиялық өзара іс-қимылды дамыту қажеттігі атап өтілді.

Байқоңыр: Байқоңыр қаласы мен іргелес аудандарда тұратын азаматтардың әлеуметтік-тұрмыстық жағдайын жақсартуға баса назар аударылды.

Отырыс қорытындысы бойынша Үкіметке ғарыш саласын жаңғырту және оның әлеуетін мемлекет мүддесі үшін тиімді пайдалану бойынша бірқатар нақты тапсырмалар жүктелді.