Каспийді құтқару үшін не істеу керек? Путин пікірін айтты

Ресей Президенті Владимир Путин Каспий теңізінің тартылу мәселесіне қатысты пікір білдірді, деп хабарлады Kazinform.

Бұған дейін Каспий теңізіне келетін судың шамамен 80%-ы Еділ өзенінен құйылып отырған еді. Алайда соңғы жылдары бұл ағыс едәуір азайған. Осыған байланысты Қазақстан тарапынан Ресейге Каспийдің тартылуын зерттеу үшін бірлескен жұмыс тобын құру туралы ұсыныс әзірленіп жатқан болатын.

"Бұл мәселені Әзербайжан Президенті Ильхам Гейдарұлы Әлиев көтерді. Мен бірден назар аудардым, өйткені бұл маған елеусіздеу болып келген екен, дегенмен бұл – өте маңызды, тіпті жаһандық сипатқа ие мәселе. Біз Арал теңізінің қайғылы тағдырын білеміз, сондықтан мұндай жағдайға жол бермес үшін дер кезінде келісілген шешімдер қабылдау қажет", – деді Владимир Путин Санкт-Петербург халықаралық экономикалық форумы аясындағы кездесуде.

Оның айтуынша, Ресей үкіметіне тиісті тапсырмалар берілген және әзербайжандық тараппен бірлескен жұмыс жалғасып жатыр.

"Мұнда бастысы – жүйелі әрі табанды түрде әрекет ету. Табиғат күшіне қарсы тұру мүмкін бе – білмеймін. Себебі Еділдің сағасындағы адам әрекетінен бөлек, бұл құбылыстардың басқа, жаһандық себептері де болуы мүмкін. Тарихта мұндай жағдайлар қайталанған. Бірде Каспий көтеріледі, бірде төмендейді. Бізге нақты себептерді анықтап, дұрыстай алмай қалатын жағдайға жол бермеу үшін қолдан келгеннің бәрін жасау керек", – деді Ресей басшысы.