Каспийдегі трагедия: бұрынғы Әскери-теңіз күштерінің бас қолбасшысы қамауға алынды

Қазақстан Қарулы күштері Әскери-теңіз күштерінің бұрынғы бас қолбасшысы Қанат Ниязбеков Каспий теңізіндегі оқу-жаттығу кезінде 14 әскери қызметшінің қаза болуына қатысты іс бойынша ұсталды. Ішкі істер министрлігінің мәліметінше, ол қызметіне салғырт қарады деген күдікке ілінген.

Ниязбеков алдымен уақытша ұстау изоляторына қамалған. Кейін сот оның қамауға алынуына санкция берді. Сотқа дейінгі тергеу жалғасып жатыр.

Қайғылы оқиға 24 қыркүйекте Маңғыстау облысында әскери оқу-жаттығу кезінде болған. Оқу-жауынгерлік міндет орындалып жатқанда ауа райы күрт нашарлап, 17 әскери қызметшіні ашық теңізге алып кеткен. Үшеуі құтқарылып, 14 адам қаза тапты.

Оқиғадан кейін қызметке салғырт қарау және кеме жүргізу қағидаларын бұзу баптары бойынша қылмыстық істер қозғалды. Тергеу барысында бұған дейін Әскери-теңіз күштері бас қолбасшысының бірінші орынбасары – штаб бастығы, екі әскери бөлім командирі, теңіз жаяу әскері ротасының командирі және катер командирі ұсталған еді.

Қанат Ниязбеков 3 қазанда Президент өкімімен Әскери-теңіз күштерінің бас қолбасшысы қызметінен босатылған болатын.