Каспийде қатты жел қайықтағы үш адамды теңізге айдап әкетті

Маңғыстау облысының Түпқараған ауданында, Каспий теңізінің жағалауында Төтенше жағдайлар министрлігі кезекті құтқару операциясын жүргізді. Ауа райының кенеттен нашарлауына байланысты ішінде адамдары бар үрлемелі қайық жағадан алыстап, ашық теңізге ығысып кеткен.

Оқиға өткен түнде орын алды. Резеңке қайықта үш адам болған. Соққан жойқын жел олардың жағаға қайту жолын кесіп, қайықты теңіз түбіне қарай айдап әкетті. Жоғалған азаматтарды іздеуге ТЖМ құтқару бөлімшелері жедел түрде аттанды. Бөлімше қызметкерлері резеңке қайықты дер кезінде тауып, ішіндегі барлық жолаушыларды аман-есен құрлыққа жеткізді. Бұдан кейін дәрігерлер тексеріп, азаматтардың медициналық көмекке мұқтаж еместігін растады. Мемлекеттік органдар тұрғындарға жел күшейген сәтте теңізге шығуға қатаң тыйым салынатынын тағы бір мәрте ескертеді.

Айта кету керек, бұл Каспий жағалауындағы соңғы күндердегі жалғыз төтенше жағдай емес. 24 қыркүйекте Әскери-теңіз күштерінің оқу-жаттығуы кезінде де дауыл көтеріліп, жел қатты күшейген еді. Соның салдарынан бір топ әскери қызметші теңізге ығысып кеткен болатын. Маңғыстау облысы әкімдігінің нақтыланған деректеріне сәйкес, суға 17 адам тап болған, оның 14-і қаза тапты.

Қазіргі уақытта оқиға орнында Премьер-министрдің орынбасары Қанат Бозымбаев бастаған үкіметтік комиссия жұмыс істеп жатыр. Ол іздеу жұмыстарын тәулік бойы тоқтаусыз жүргізуді және қаза тапқандардың отбасыларына барлық қажетті көмекті көрсетуді тапсырды. Оқиғаның мән-жайы мен себептері қылмыстық іс аясында тексеріліп жатыр. 

Малика Азимбекова