Каспий итбалығын сақтау үшін табиғи резерват құрылады

«Ашық НҚА» сайтында Каспий итбалығы популяциясын сақтау үшін мемлекеттік табиғи резерват құру туралы Үкімет қаулысының жобасы жарияланды. Оны Ауыл шаруашылығы министрлігінің Балық шаруашылығы комитеті басқаратын болады.

Құжатқа сәйкес, Каспий теңізінде, Маңғыстау және Атырау облыстарының аумағында құрылатын резерваттың жалпы ауданы 109 558,04 гектарды, қорғау аймағының ауданы 69 839,62 гектарды құрайды.

Балық шаруашылығы комитеті резерваттың шекарасын белгілейді. Оны республикалық бюджеттен қаржыландырады.

Ауыл шаруашылығы министрлігінің түсіндірме хатында Мемлекет басшысы Каспий итбалықтарының популяциясын сақтау мақсатында мемлекеттік табиғи резерват құру мүмкіндігін қарастыруды тапсырғаны атап өтілген. Осыған байланысты тиісті Үкімет қаулысының жобасы әзірленді.

Ауыл шаруашылығы министрлігі Каспий итбалығы өсімдіктер мен жануарлардың сирек кездесетін және жойылып кету қаупі төнген түрлерінің тізіміне енгізілгенін еске салды.

Қаулы жобасы 5 маусымға дейін қоғамдық талқылауға ашық болады, бірақ құжатта «бұл қаулы 2024 жылдың 1 мамырынан бастап күшіне енеді» делінген.

2022 жылғы 7 қараша мен 3 желтоқсан аралығында Маңғыстау облысының Түпқараған ауданында Каспий теңізі жағалауында жүргізілген рейдтер барысында 172 өлі итбалық өлексесі табылған.

2023 жылы да Каспий жағалауында ондаған өлі итбалық табылды. Ал биыл 29 наурыз бен 25 сәуір аралығында 182 итбалық өлексесі табылды.