Қаскелеңде сабақ үстінде оқушы қайтыс болды

Алматы облысының Қаскелең қаласында мектепте қайғылы жағдай орын алды. Kazinform агенттігінің мәліметінше, оқиға академик Қаныш Сәтбаев атындағы білім ордасында тіркелген.

Қарасай аудандық білім бөлімінің хабарлауынша, 15 жастағы 9-сынып оқушысы бірінші сабақтан кейінгі үзіліс кезінде кенеттен өзін нашар сезінген. Мектеп басшылығы жедел түрде жедел жәрдем қызметін шақырған.

Дегенмен көрсетілген шұғыл медициналық көмектерге қарамастан, жасөспірімді аман алып қалу мүмкін болмаған. Оқиға болған сәтте мектеп аумағында жергілікті атқарушы орган өкілдері де болған.

Марқұмның денесі сот-медициналық сараптамаға жолданды. Қазіргі уақытта оқиғаның мән-жайын анықтау үшін тексеру және тергеу амалдары жүргізілуде.