$ 479.82 € 559.9 ₽ 6.15

Қарызы жоқ қазақстандықтардың шоттары бұғатталып қалған: себебі белгілі болды

Абдрахманов Мағжан
10 сәуір 2026, 10:48
Қарызы жоқ қазақстандықтардың шоттары бұғатталып қалған: себебі белгілі болды Сурет авторы: gov.kz

Қазақстанда салық берешегі жоқ кейбір азаматтың банк шоты бұғатталған, деп хабарлады Мемлекеттік кірістер комитеті. Ведомство мұны камералдық бақылауды автоматтандыру кезінде кеткен техникалық ақаумен байланыстырды.

Комитет мәліметінше, жаңа әдістемені енгізу барысында жекелеген хабарламалар бойынша банк шоттарындағы шығыс операциялары негізсіз тоқтатылған. Қазір қате түзетіліп, бұған дейін қабылданған шектеу шаралары алынып жатыр.

Мәселеге бухгалтер Рәбиям Серікбаева назар аударған. Оның айтуынша, бұл жағдай едәуір көп азаматқа әсер еткен.

Мемлекеттік кірістер комитеті камералдық бақылау үдерісін толық автоматтандыруды жалғастырып жатқанын мәлімдеді. Бұл шара адам ықпалын азайтуға, жемқорлық қаупін сейілтуге және салықтық әкімшілендірудің тиімділігін арттыруға бағытталған.

Ведомство келтірілген қолайсыздық үшін кешірім сұрап, шоттарға қойылған шектеулерді алу жұмыстары 10 сәуірде толық аяқталатынын хабарлады.

#Банк шоты #Бұғаттау #Мемлекеттік кірістер комитеті #Салық берешегі

Соңғы жаңалықтар