Карла Жаманқұлова «Әділ сөз» қорының президенті қызметінен кетті

Халықаралық сөз бостандығын қорғау «Әділ сөз» қорының президенті Карла Жаманқұлова қызметінен кететінін мәлімдеді. Сондай-ақ ол қордың құрылтайшылар құрамынан шығу туралы өтініш берген.

Жаманқұлованың айтуынша, бұл шешім Құрылтай депутаттығына кандидат ретінде ұсынылуына байланысты қабылданған. Оның сөзінше, мақсат – мүдделер қақтығысына жол бермеу.

Ол әлеуметтік желідегі жазбасында «Әділ сөз» қорының өміріндегі әр кезең өзіне жақын болғанын айтып, ұйымның сөз бостандығын қорғаудағы рөліне жоғары баға берді. Сондай-ақ қор ұжымына, серіктестеріне және өңірлердегі әріптестеріне алғыс білдірді.

Карла Жаманқұлова алдағы уақытта қордың құрылтайшылары жаңа президентті сайлап, бұл туралы ресми хабарлайтынын жеткізді. Ол «Әділ сөз» қоры Қазақстанда сөз бостандығын қорғау жолындағы қызметін жалғастыра беретініне сенім білдірді.

Еске салайық, 10 шілдеде «Әділет» партиясы Құрылтай сайлауына қатысатын кандидаттарының тізімін жариялаған болатын. Тізімге 186 кандидаттың қатарында Карла Жаманқұлова да енгізілді. Ол «Әділ сөз» қорын 2022 жылдың соңынан бері басқарып келді. Бұған дейін бұл қызметті қор құрылған 1999 жылдан бастап Тамара Калеева атқарған.