$ 499.65 € 582.89 ₽ 6.47

Кәрім Мәсімов Тоқаевтан рақымшылық жасауды өтінді

Редакция
10 маусым 2024 02:41 1194
Кәрім Мәсімов Тоқаевтан рақымшылық жасауды өтінді Сурет авторы: 365info.kz

Мемлекетке опасыздық жасау және билікті басып алуға әрекеттену бойынша сотталған ҰҚК-нің бұрынғы басшысы Кәрім Мәсімов рақымшылық сұрап, өтініш білдірді, деп хабарлайды Qrnews тілшісі Informburo.kz сайтына сілтеме жасап.

Қазіргі уақытта Кәрім Мәсімов Сыбайлас жемқорлыққа қарсы іс-қимыл агенттігінің қаулысына сәйкес Астанадағы ҰҚК тергеу изоляторында ұсталып отыр.

"Шынымен де, ол 2024 жылдың наурыз айында осы мекемеден Қазақстан Республикасының президентіне рақымшылық жасау туралы өтініш жіберді", – делінген ҰҚК-нің informburo.kz-ке берген жауабында.

Сонымен қатар Мәсімовке қатысты Қылмыстық кодекстің 218-бабы 3-бөлігі 3-тармағы ("Қылмыстық жолмен алынған ақшаны және басқа мүлікті заңдастыру (жылыстату)") және 366-бабы 4-бөлігі ("Аса ірі мөлшерде пара алу") бойынша сотқа дейінгі тергеу жалғасып жатыр.

Кәрім Мәсімов 2022 жылдың қаңтар оқиғалары кезінде ұсталған болатын. Оған қатысты қылмыстық іске "өте құпия" деген белгі қойылған. 2023 жылдың сәуір айының соңында Астана соты Кәрім Мәсімовті мемлекетке опасыздық жасау, билікті күшпен басып алуға әрекеттену, билікті асыра пайдалану және қызметтік өкілеттілігінен асып кету бойынша 18 жылға бас бостандығынан айыруға үкім шығарды. Мәсімов үкімге шағым түсіруге тырысқанымен, апелляциялық сот жазаны өзгеріссіз қалдырды.

Соңғы жаңалықтар