Қарапайым халық декларация тапсырмайды

Қазақстан үкіметі Президент Қасым-Жомарт Тоқаевтың жалпыға бірдей декларациялаудан бас тарту бастамасын қолдады. Қаржы министрі Мәди Тәкиевтің хабарлауынша, жаңа жылдан бастап шамамен 8 миллион адам декларация тапсырудан босатылады.

Министрдің айтуынша, жалпы декларациялау жүйесінің алғашқы үш кезеңі аясында 4,8 миллион адам қатысқан: мемлекеттік қызметшілер, коммерциялық ұйымдардың басшылары мен құрылтайшылары, квазимемлекеттік сектор және олардың жұбайлары. Төртінші кезеңде 2025 жылы декларация қалған азаматтарды: жеке сектор қызметкерлерін, зейнеткерлерді, үй шаруасындағы әйелдерді, студенттерді және басқаларды қамтуы тиіс болатын. Бұл – шамамен 8 миллион адам.

Алайда Такиевтің айтуынша, жалпы декларациялау тұжырымдамасы қабылданғаннан бері 14 жыл өтіп, Қазақстанда мемлекеттік органдардың дерекқорлары цифрландырылды, қолма-қолсыз төлемдер үлесі 86%-ға жетті, ал қаржылық және валюта бақылауы күшейтілді. Осыған байланысты қалған азаматтар табыс декларациясын тапсырудан босатылады.

Министрдің айтуынша, бұл өзгеріс 90%-дан астам жеке тұлғаларды қамтиды. Дегенмен шетелде активтері бар азаматтар, жыл ішінде құны 20 000 АЕК-тен асатын сомаға сауда жасағандар, сондай-ақ өз бетінше салық төлеуге жататын кірістер алған азаматтар үшін декларациялау міндетті болып қала береді.

Сондай-ақ азаматтарға ерікті түрде декларация тапсыру құқығы ұсынылады. Заңнамаға қажетті түзетулер дайындалды.

Премьер-министр Олжас Бектенов бұл ұсынысты қолдап, Қаржы, Ұлттық экономика және Әділет министрліктеріне үш күн ішінде қажетті өзгерістерді дайындап, оларды Парламентке ұсынуды тапсырды.