Қарағандыда студент есірткі таратқаны үшін 15 жылға сотталды

Қарағанды қаласында колледж студенті есірткі заттарын заңсыз таратқаны үшін 15 жылға бас бостандығынан айырылды. Бұл туралы Қаржылық мониторинг агенттігі хабарлады.

Агенттік мәліметінше, студент Telegram мессенджері арқылы «куратормен» байланыс орнатып, есірткі тасымалдаушы-курьер ретінде жұмыс істеген. Ол көрсетілген координаттар бойынша есірткіні алып, оларды бөліп орап, қала аумағында жасырын орындарға қалдырып отырған. Күніне шамамен 30-ға жуық «закладка» жасағаны анықталды.

Сонымен қатар жас азамат Таиландтан Қазақстанға есірткі жеткізуді ұйымдастырғаны белгілі болды.

Күдіктіні ұстау кезінде одан 909 грамм каннабис экстракты тәркіленген. Ал тұрғылықты мекенжайынан тағы 80 грамм есірткі табылған. Бұған қоса, жасырылған орындар бойынша 3,34 грамм есірткі заты анықталды.

Сот шешімімен студент 15 жыл мерзімге бас бостандығынан айырылды. Үкім әзірге заңды күшіне енген жоқ.