Қарағандыда екі дәрігерді соққыға жықты деген күдікті қамауға алынды

Қарағанды облыстық полиция департаментінің хабарлауынша, облыстық балалар ауруханасының аумағында екі дәрігерді ұрды деген күдікке ілінген азамат екі айға қамауға алынды.

– Күдіктіге қатысты соттың санкциясымен бұлтартпау шарасы ретінде қамауға алу шешімі қабылданды. Қазіргі уақытта қылмыстық іс бойынша тергеу жалғасып жатыр, – деп мәлімдеді полиция өкілдері.

Оқиға 12 маусым күні Қарағанды облыстық балалар ауруханасының ауласында болған. Алдын ала мәлімет бойынша, 38 жастағы жергілікті тұрғын медициналық қызметкерлермен жанжалдасып, оларды ұрып-соққан. Кейін оның ауруханадағы науқастардың бірінің туысы екені анықталды.

Дәрігерлер ауыр жарақат алған. Олар облыстық аурухананың жедел нейрохирургия бөліміне жатқызылған. Жараланған медицина қызметкерлерін ҚР Денсаулық сақтау министрі Ақмарал Әлназарова өзі арнайы барып көріп шықты. Министр бұл оқиғаны медицина қызметкерлеріне жасалған "масқаралық күш көрсету әрекеті" деп бағалады.

Қазір аталған факт бойынша Қылмыстық кодекстің тиісті бабымен іс қозғалып, тергеу амалдары жалғасып жатыр.