Қарағанды облысында тұрмыстық қалдықтарға арналған жаңа полигон салынып жатыр

Қарағанды облысының Абай қаласында қатты тұрмыстық қалдықтарға арналған жаңа полигон құрылысы аяқталуға жақын. Мәжіліс депутаты, «AMANAT» партиясы фракциясының мүшесі Никита Шаталов нысанда болып, жұмыс барысымен танысты. Оның айтуынша, полигон құрылысының 90 пайызы біткен, қыркүйек айында пайдалануға беру жоспарланған.

Жаңа кешен әкімшілік ғимарат, медициналық пункт, қызметкерлерге қажетті инфрақұрылыммен толық қамтамасыз етіледі. Жылына 15 мың тонна қалдықты сұрыптайтын желі орнатылып, пластикті қайта өңдеуге арналған жабдықтар қойылады. Сонымен қатар шикізатты уақытша сақтау алаңдары, көмуге арналған траншеялар және электронды автомобиль таразылары қарастырылған.

Полигон жұмысын арнайы кәсіпорын жүргізеді. Бұл – жаңа жұмыс орындарының ашылуына, экологиялық қауіпсіздіктің күшеюіне және қоршаған ортаға заманауи бақылау енгізілуіне мүмкіндік береді.

Депутат Никита Шаталовтың айтуынша, бұл жоба – Мемлекет басшысы Қасым-Жомарт Тоқаевтың жаңа экологиялық мәдениетті қалыптастыру және озық технологияларды енгізу жөніндегі тапсырмаларын жүзеге асырудың нақты нәтижесі.

"Қалдықтарға арналған заманауи полигон салу – экологиялық ахуалды жақсартып, қосымша жұмыс орындарын ашуға ықпал етеді. Бұл – сайлаушыларға берген уәденің орындалып жатқанын көрсететін маңызды жоба", – деді ол.

«AMANAT» партиясының сайлауалды бағдарламасы аясында алдағы жылдары Қарағандыда қалдықтарды энергетикалық жолмен қайта өңдейтін зауыт салу жоспарланған. Сондай-ақ 2027 жылға дейін облыс аумағында сұрыптау желісі бар тағы алты полигон іске қосылмақ.