Қарағанды облысында Су-30СМ жойғыш ұшағы апатқа ұшырады

Қазақстан Республикасы Қорғаныс министрлігінің баспасөз қызметі Қарағанды облысында әскери ұшақтың апатқа ұшырағаны туралы ресми мәлімдеме жасады.

Ведомствоның хабарлауынша, ағымдағы жылдың 25 ақпанында жоспарлы оқу-жаттығу ұшуларын орындау барысында Су-30СМ көпфункционалды жойғыш ұшағы құлаған.

Төтенше жағдай кезінде ұшақ экипажы уақытылы катапульта жасап үлгерді. Қазіргі уақытта ұшқыштар аман, олардың өмірі мен денсаулығына төніп тұрған қауіп жоқ. Әскери мамандар медициналық бақылауға алынды.

Оқиға орын алған аумақ дереу қоршауға алынды. Қорғаныс министрлігі апаттың тұрғындар мен инфрақұрылым нысандарына ешқандай қауіп төндірмейтінін атап өтті.

Апаттың себептері мен мән-жайын анықтау үшін ҚР Қорғаныс министрлігінің Ұшу қауіпсіздігі департаментінің бастығы бастаған арнайы комиссия құрылды.

«Комиссия құрамына авиация қызметінің бейінді мамандары енгізілді. Тергеу қорытындысы бойынша оқиғаға құқықтық баға беріліп, тиісті процессуалдық шешім қабылданады», - деп толықтырды министрліктің баспасөз қызметі.