Қанша қазақстандық несие алудан ерікті түрде бас тартты?

Қазақстанда 3 миллионнан астам азамат «Стоп кредит» сервисі арқылы несие мен микрокредит алуға ерікті түрде тыйым қойды. Бұл туралы Fingramota.kz хабарлады.

Қызметті eGov.kz порталы немесе eGov Mobile қосымшасы арқылы ЭЦҚ көмегімен қосуға болады. Шектеудің қолданылу мерзімі шектелмеген, қалаған уақытта алып тастауға мүмкіндік бар.

«Стоп кредит» белгісі тұрған азаматтарға банктер мен микроқаржы ұйымдары несие беруден автоматты түрде бас тартады. Бұл туралы ақпарат олардың кредиттік тарихында көрсетіледі.

2024 жылдың қыркүйегінен бастап заңға енгізілген өзгерістер азаматтарды несие алаяқтарынан қорғауды күшейтті. Егер өз еркімен несие алуға тыйым қойған азаматтың келісімінсіз несие рәсімделсе, мұндай қарызды қаржы ұйымы – банк немесе МҚҰ есептен шығаруға міндетті.

Мамандар қазақстандықтарға несие тарихын тұрақты түрде тексеріп тұруды, сондай-ақ электронды цифрлық қолтаңбаны (ЭЦҚ) пайдалану кезінде сақтық шараларын қатаң сақтауды ескертеді:

• ЭЦҚ-ны үшінші тұлғаларға бермеу;

• ЭЦҚ-ны мессенджерлер арқылы жібермеу;

• Файл атауына ЭЦҚ паролін жазбау.