Канье Уэсттің концерті: Еліміз жаңа табыс көзін тапты

Канье Уэсттің Алматыдағы концертіне 30 мыңнан астам адам жиналып, көрші елдерден мыңдаған турист ағылды. Каржы сарапшысы Ғалым Құсайыновтың айтуынша, бұл оқиға Қазақстан үшін миллиондаған доллар әкелетін оқиғалық туризм нарығын ашуға үлкен мүмкіндік беріп отыр.

Бұл бағыт – тек концерттер емес, фестивальдер, спорттық сайыстар мен халықаралық форумдар. Мұндай шаралар ең алдымен шағын және орта бизнеске пайда әкеледі. 2025 жылы Алматыға келген 754 мың шетелдік қонақтың әрқайсысы орташа есеппен 4 күнге қалып, $1,5 мың жұмсаған. Ендігі басты міндет – туристердің елде одан да ұзақ аялдап, көбірек қаржы қалдыруын қамтамасыз ету.

Қазіргі геосаяси жағдайда Қазақстан өзінің қауіпсіздігі мен дамыған қалаларының арқасында Орталық Азиядағы басты оқиғалар алаңына айнала алады. Oл үшін әуежай, автотұрақ мен картамен төлеу жүйелерін шетелдіктерге ыңғайлы етіп, өңірде ортақ виза («Шенген» сияқты) енгізу қажет. Сарапшының сөзінше, басты мақсат – тек жұлдыз шақыру емес, бір кешке келген қонақты апталап қалатындай етіп қызықтыру.