Канье Уэстің концерті: Алматыда автобустар мен троллейбустардың бағыты өзгереді

Алматыда 14 тамызда Орталық стадионда өтетін Канье Уэстің концертіне байланысты 32 автобус пен троллейбус бағытының қозғалыс сызбасы уақытша өзгереді, деп хабарлады қалалық Жол қозғалысын ұйымдастыру және жолаушылар көлігі басқармасы.

Өзгерістер сағат 16:00-ден 00:00-ге дейін күшінде болады. Осы аралықта Орталық стадион маңында көлік қозғалысы шектеледі. Абай даңғылы мен Сәтбаев көшесінің Байзақов көшесінен Сейфуллин даңғылына дейінгі бөлігі, сондай-ақ Байтұрсынұлы көшесінің Шевченко көшесінен Тимирязев көшесіне дейінгі аралығы уақытша жабылады.

Осыған байланысты №3, 18, 21, 25, 30, 34, 44, 57, 62, 65, 66, 79, 90, 92, 95, 98, 118, 120, 120А, 121, 128, 130, 209, 210, 211, 224 автобустары мен №ТП5, ТП6, ТП7, ТП9, ТП19 және ТП25 троллейбустарының жүру бағыты өзгереді.

Бұған дейін әкімдік концерт өтетін күні «Байқоңыр» метро бекеті жолаушылар үшін сағат 21:00-де жабылатынын хабарлаған. Концертке келушілерге «Абай» және «Мұхтар Әуезов атындағы театр» бекеттерін пайдалану ұсынылды. Метро жұмысы кемінде түнгі 01:00-ге дейін, қажет болған жағдайда 03:00-ге дейін ұзартылады.

Концерт аяқталғаннан кейін көрермендерді Орталық стадионнан алты бағытқа тегін қатынайтын 60 автобус тасымалдайды. Олар «Алматы Арена», Райымбек батыр даңғылы – «Алатау» метро бекеті, «Алматы-1» теміржол вокзалы, Орбита және Жұлдыз шағынаудандары мен Алматы әуежайына қатынайды.