Канье Уэст концертіне билет сату уақыты кейінге шегерілді

Алматыда өтетін америкалық рэпер Канье Уэсттің концертіне билеттерді сату уақыты кейінге шегерілді. Бұл жөнінде іс-шараны ұйымдастырушы First Media Group және Freedom Holding компаниялары біріккен мәлімдемесінде хабарлады.

Билет сатылымының кешігуіне «Қайрат» футбол клубының стадионды пайдалануға қатысты қатаң мәлімдемесі себеп болған. Кестеге енгізілген өзгерістерге сәйкес, алдын ала сатылым 21 шілде сағат 12:00-де шектеулі мөлшерде Freedom SuperApp қосымшасында басталады. Ал 23 шілдеден бастап барлық қалаушылар билеттерді қосымша арқылы немесе Ticketon.kz сайтынан сатып ала алады. Концерттің өтетін күні мен орны өзгеріссіз қалды – іс-шара 14 тамыз күні Алматының Орталық стадионында өтеді.

«Біз үшін, көптеген қазақстандықтар сияқты, "Қайрат" – біз шын жүректен қолдайтын және жанкүйер болатын команда. Сондықтан қазіргі уақытта біз барлық тараптың мүддесін ескеретін ең қолайлы шешім табу үшін сындарлы диалог жүргізіп жатырмыз», – делінген ұйымдастырушылардың ресми хабарламасында.

Еске сала кетейік, 17 шілде күні «Қайрат» футбол клубы концерттің өтетін күні ұйыммен келісілмегенін мәлімдеген болатын. Клуб басшылығының айтуынша, тамыз айында стадион кестесі іс жүзінде толық бос емес. Сонымен қатар мұндай ауқымдағы шоуға сахна орнату, жабдықтарды қою және жинау жұмыстары көп уақытты қажет ететіндіктен, бұл стадион газонының жағдайына және команданың ресми матчтарға дайындығына кері әсер етуі мүмкін.