Канье Уэст концерті қарсаңында алаяқтар жалған билет сата бастаған

Алматыда америкалық рэпер Ye, яғни Канье Уэстің концертіне жалған билет сатпақ болған жас жігіт анықталды. Бұл туралы Алматы қаласының Полиция департаменті хабарлады.

Полиция әлеуметтік желілерді бақылау барысында концерт билетін сататыны туралы хабарландыру жариялаған жігітті анықтаған. Құқық қорғау органдары оның әрекетін дер кезінде тоқтатқандықтан, билет сатып алмақ болған адамдар зардап шекпеген.

Канье Уэстің концерті 14 тамызда Алматыдағы Орталық стадионда өтеді. Полиция ірі музыкалық шара қарсаңында әлеуметтік желілерді, хабарландыру сайттарын және басқа да интернет алаңдарын тәулік бойы бақылап отырғанын мәлімдеді.

Құқық қорғау органдары тұрғындар мен қала қонақтарын билетті тек ресми сату орындарынан алуға, бейтаныс адамдарға ақша аудармауға және күмәнді хабарландыруларға сенбеуге шақырды.

Сондай-ақ полиция нарықтағыдан арзан билет пен ақшаны шұғыл алдын ала аударуды талап ететін ұсыныстардан сақ болуды ескертті. Мұндай тәсілді алаяқтар ірі іс-шаралар қарсаңында жиі пайдаланады.