Израиль мен ХАМАС келіссөз бастайды – тұтқындар босатыла ма?

Израиль мен ХАМАС дүйсенбі күні Мысырда келіссөз өткізеді. Кездесудің басты мақсаты – Газадағы соғысты тоқтату және тұтқындарды алмастыру. 

АҚШ президенті Дональд Трамп барлық тарапты «жылдам әрекет етуге» шақырды. Оның айтуынша, демалыс күндері ХАМАС және басқа елдермен «өте жақсы» келіссөздер өткен.

«Бірінші кезең осы аптада аяқталуы керек», – деді Трамп өзінің Truth Social әлеуметтік желісінде.

ХАМАС бұған дейін Газада ұстап отырған израильдіктердің барлығын қайтаруға дайын екенін мәлімдеді. Ұйымның қолында 48 адам бар, олардың шамамен 20-сы ғана тірі деп болжанады.

Трамп ұсынған жоспарға сәйкес, келісім расталғаннан кейін 48 сағат ішінде барлық тұтқын босатылуы керек. Ал Израиль жүздеген палестиналық тұтқынды босатады. Сондай-ақ ХАМАС келісімге қосылса, ұйым мүшелеріне амнистия беріледі, аймақтан қауіпсіз түрде шығуларына кепілдік беріледі. Ал Газаны уақытша үкімет басқарады.

Израиль премьер-министрі Беньямин Нетаньяху бұл жоспарды екі кезеңмен іске асыруды ұсынды: алдымен тұтқындар алмасады, кейін ХАМАС қарудан бас тартуы тиіс. Егер ұйым бұған келіспесе, Израиль күш қолдануы мүмкін екенін ескертті.

Алайда ХАМАС қаруды тапсыру талабымен келіспейді. Ұйым өкілі Муса Абу Марзук Al Jazeera арнасына берген сұхбатында:

«Палестина мемлекеті құрылған күні ғана біз қаруымызды сол мемлекетке тапсырамыз», – деді.

Израиль болса, тәуелсіз Палестина құрылса, өз еліне қауіп төнеді деп санайды.

Трамптың жаңа жоспары бұған дейінгі ұсыныстардан өзгеше. Бұрын АҚШ әкімшілігі Газаның халқын көшіріп, аймақты АҚШ билігіне беруді қарастырған еді, ал жаңа жоспар палестиналықтардың өз жерінде қалуына мүмкіндік береді.