Италия соты Loro Piana брендіне бақылау орнатты

Әлемдік сән индустриясында үлкен беделге ие француздық LVMH компаниясының құрамына кіретін Loro Piana брендіне қатысты Италия соты төтенше шешім қабылдады. Милан соты компанияны бір жылға сот әкімшілігінің бақылауына берді. Бұған себеп – еңбек құқықтарының өрескел бұзылуы.

Сот құжаттарына сәйкес, компания өндірістің белгілі бір бөлігін Қытай мен Италияда тіркелген қосалқы мердігерлерге тапсырған. Алайда бұл цехтарда жұмысшылар аптасына 90 сағатқа (күніне - 12 сағат) дейін еңбек еткен, кейбірі жұмыс орнының ішінде өмір сүрген, әрі төмен жалақыға немесе мүлдем жалақысыз жұмыс істеген. Жұмысшылардың бір бөлігі – заңсыз мигранттар, олар ешқандай еңбек шартысыз жұмысқа тартылған.

Loro Piana-ның өзі бұл заңсыз әрекеттерге тікелей қатысы болмағанын алға тартса да, сот компанияны жеткізушілерін бақылаусыз қалдырғаны үшін кінәлі деп тапты. Осыған байланысты брендке сырттан арнайы әкімші тағайындалды. Бұл әкімші алдағы бір жыл бойы компанияның өндірістік және басқару процестерін тексеріп, заң талаптарының орындалуын қамтамасыз етеді.

Бұған дейін дәл осындай себептермен Италия соты Valentino, Dior, Armani және Alviero Martini секілді атақты брендтерге де соттық әкімшілік бақылау енгізген болатын.

Милан прокуратурасы бұл процестердің «кең таралған тұрақты өндірістік тәжірибе» екенін айтады. Италияда сән саласының негізгі бөлігін құрайтын шағын және орта өндірістік цехтар жиі еңбек кодексін айналып өтіп, заңсыз жұмыс істеу схемаларын қолданып келеді. Олар шетелдік тапсырысты қабылдай отырып, тиімділік пен шығынды азайту жолында адам еңбегін заңсыз пайдаланудан тайынбайды.

LVMH басшылығы бұл мәселеге қатысты ешқандай ресми түсініктеме берген жоқ, бірақ компания ішкі аудит жүргізіп, жағдайды зерттеп жатқандарын айтты. Loro Piana атауы сән әлемінде жоғары сапалы кашемир және жүн өнімдерімен танымал. Ол 2013 жылдан бері LVMH тобының құрамына кіреді.

Автор: Әмір Жәнібек