Испания мен Франция әлем чемпионатының алғашқы финалисін анықтайды

Бүгін Испания мен Франция құрамалары 2026 жылғы футболдан әлем чемпионатының алғашқы жартылай финалында кездеседі. Ойын АҚШ-тың Техас штатындағы Арлингтон қаласында орналасқан «Даллас» стадионында өтеді.

Матч Қазақстан уақытымен 15 шілдеге қараған түні сағат 00:00-де басталады.

Испания сапында Ламин Ямаль, Нико Уильямс пен Микель Мериноға үміт артылса, Франция шабуылында Килиан Мбаппе, Майкл Олисе және Усман Дембеле ойнайды. Франция биылғы әлем чемпионатында 14 гол соғып, екі доп қана жіберген. Испания қақпашысы Унаи Симон турнирдегі ең ұзақ уақыт гол жібермеген ойыншы атанды. Екі құрама да осы әлем чемпионатында әзірге есепте ұтылып көрген жоқ.

«Франция өзінің зор мүмкіндігін көрсетті. Алдағы кездесуден күтеріміз көп. Сонымен бірге бұл ойынның қаншалықты қиын болатынын түсінеміз», – деді Испания құрамасының бас бапкері Луис де ла Фуэнте.

Франция әлем чемпионатының жартылай финалына қатарынан үшінші рет шықты. Дидье Дешамның командасы 2018 жылы әлем чемпионы атанып, 2022 жылы күміс жүлде иеленген. Испания бұл кезеңге 2010 жылдан бері алғаш рет жетіп отыр. Сол жылы испандар Оңтүстік Африка Республикасында өткен додада чемпион болған.

Екі құрама бұған дейін 38 рет кездескен. Испания 18 ойында, Франция 13 кездесуде жеңіске жеткен. Испандар қарсыласын 2024 жылғы Еуропа чемпионатының және 2025 жылғы Ұлттар лигасының жартылай финалында жарыстан шығарған.

«Испания – қазіргі Еуропа чемпионы. Былтыр Ұлттар лигасының жартылай финалында да солармен ойнадық. Әлем чемпионаты басталғанға дейін бізді басты үміткерлердің бірі деп атады, бірақ бұл кездесудің фавориті – Испания», – деді Франция құрамасының бас бапкері Дидье Дешам.

Матчты қазақстандық көрермендер «Qazaqstan» және «Qazsport» телеарналарынан тамашалай алады.