Иранның жаңа көсемі алғашқы ресми мәлімдемесінде не айтты?

Иранның жаңа рухани көсемі Мұжтаба Хаменеи билікке келгелі бері алғаш рет мәлімдеме жасады. Оның сөзін Иранның мемлекеттік телеарнасы оқыды.

Мәлімдемеде Хаменеи Иран қаза тапқандар үшін кек алудан бас тартпайтынын айтып, халықты бірлікке шақырған. Сонымен қатар ол әлемдік мұнайдың шамамен 20 пайызы өтетін Ормуз бұғазын жабу мүмкіндігі әлі де қарастырылып жатқанын жеткізді.

Иран басшысы аймақтағы АҚШ әскери базалары жабылуы тиіс екенін мәлімдеді. Оның айтуынша, егер бұл талап орындалмаса, америкалық нысандарға соққылар жалғасуы мүмкін.

Хаменеи Тегеран көршілес елдерге қарсы емес екенін атап өтті. Оның сөзінше, Иран Таяу Шығыс елдеріндегі америкалық базаларды ғана нысанаға алып отыр.

Сондай-ақ ол аймақтағы елдерді өз ұстанымын айқындауға шақырып, АҚШ-тың қауіпсіздікке қатысты берген уәделерін «жалған» деп атаған.

Хаменеи Иран қарсыластары елге келген шығын үшін өтемақы төлеуі тиіс екенін де айтты. Егер бұл орындалмаса, Тегеран олардың активтерінен қаражат алуы немесе мүліктеріне зиян келтіруі мүмкін екенін мәлімдеді.

Мәлімдемеде АҚШ пен Израильдің шабуылы салдарынан оның жұбайы мен әпкесі қаза тапқаны да айтылған.

Бұған дейін халықаралық басылымдар Мұжтаба Хаменеи АҚШ пен Израильдің соққылары кезінде жараланғанын жазған. Иран сыртқы істер министрлігі бұл ақпаратты растаған.

28 ақпанда АҚШ пен Израиль Иранға қарсы әскери операция бастаған. Сол шабуылдар барысында Иранның рухани көсемі Әли Хаменеи қаза тауып, 8 наурызда оның орнына ұлы Мұжтаба Хаменеи сайланған. Оны Иранның Сарапшылар кеңесі таңдаған.