Ираннан шығу жолы: Қазақстан азаматтарын үш ел арқылы эвакуацияламақ

Қазақстан Сыртқы істер министрлігі Таяу Шығыстағы шиеленіске байланысты отандастарды қауіпсіз аймақтарға шығару бағытында жұмысын жалғастырып жатыр. Ведомствоның мәліметінше, Қазақстан Ираннан азаматтарды Әзербайжан, Түрікменстан және Армения аумағы арқылы эвакуациялау жөнінде келісімге келген.

Министрлік хабарлауынша, Армения тарапымен Қазақстан азаматтарының Иран–Армения шекарасын кедергісіз кесіп өтуі мәселесі келісілген. Арменияның сыртқы істер ведомствосымен тұрақты байланыс орнатылған. Осындай келісім Әзербайжанмен де жасалған. Әзербайжан билігі эвакуацияға қолдау көрсетуге дайын екенін білдірген.

Шекараның құрлықтағы өткізу режимі шектеулі болғандықтан, арнайы рұқсат қажет. Қазақстанның Әзербайжандағы елшілігі екі азаматтың өтініші бойынша Ираннан «Джульфа» (Нахчыван) бақылау-өткізу бекеті арқылы кіруге жедел рұқсат алған. Түрікменстан да қазақстандықтардың мемлекеттік шекарадан өтуіне жәрдемдесуге дайын екенін растады.

Бұған дейін СІМ дипломатиялық өкілдіктер туристік компаниялармен бірлесіп, әуежайлар мен транзиттік аймақтарда қалған азаматтарды орналастыру мәселесін шешіп жатқанын хабарлаған. Аймақта әскери іс-қимылдар басталғалы бері көптеген елде әуе кеңістігі жабық. Соған байланысты рейстер тоқтатылып, жолаушылар уақытша қонақүйлерге орналастырылуда.

Эвакуациялық рейстер ұйымдастырылған жағдайда алдымен қарттар, әйелдер мен балалар елге жеткізіледі. Бұған дейін Тегераннан 50 Қазақстан азаматы шығарылған.

Ресми деректерге сәйкес, өңірдегі қазақстандықтардың басым бөлігі туристік және қажылық бағыттарда орналасқан. Біріккен Араб Әмірліктерінде – 3 500, Сауд Арабиясында – шамамен 3 000, Қатарда – 1 500 азамат бар. Сонымен қатар Иранда – 82, Бахрейнде – 168, Кувейт пен Иорданияда – әрқайсысында 134, Израильде – шамамен 100 қазақстандық жүр.