Иран Қазақстанға Парсы шығанағындағы маңызды порттардың бірінен арнайы жер телімін бермек

Ұлттық экономика министрі Серік Жұманғарин мен Иранның жол және қаланы дамыту министрі Фарзане Садек кездесіп, көлік дәліздерін дамыту, порт инфрақұрылымын жаңғырту және инвестициялық ынтымақтастықты кеңейту мәселелерін талқылады. Екі мемлекет алдағы жылдары өзара тауар айналымын 3 миллиард долларға дейін жеткізуді мақсат етіп отыр.

Кездесудің негізгі тақырыптарының бірі теңіз порттары бағытындағы ынтымақтастық болды. Иран тарапы Бендер-Аббас қаласында орналасқан Шахид Раджаи портынан Қазақстанға арнайы жер телімін беру жөніндегі рәсімдердің толық аяқталғанын хабарлады. Қазіргі уақытта аумақты қазақстандық тарапқа беру жұмыстары жүргізіліп жатыр. Сонымен қатар Иран Қазақстанға Чабахар портындағы жобаларға қатысуды ұсынды. Аталған порт Қазақстан үшін Оңтүстік және Оңтүстік-Шығыс Азия елдерінің нарығына шығатын маңызды бағыттардың біріне айналуы мүмкін.

Өз кезегінде қазақстандық тарап ирандық логистикалық компанияларға Каспий теңізіндегі Ақтау және Құрық порттарының инфрақұрылымын пайдалануға мүмкіндік беруге дайын екенін мәлімдеді. Атап айтқанда, арнайы алаңдар, айлақтар мен терминалдар ұсыну мәселесі қарастырылып отыр.

Дегенмен, 2026 жылдың алғашқы үш айында Қазақстан мен Иран арасындағы сауда көлемі өткен жылдың сәйкес кезеңімен салыстырғанда шамамен 30 пайызға төмендеген.