Иран футболдан 2026 жылғы Әлем чемпионатына қатысу үшін ФИФА-ға шарт қойды

Иран құрамасы алдағы футболдан Әлем чемпионатына қатысу ниетін растады, алайда ФИФА мен ұйымдастырушы елдерден қосымша кепілдіктер талап етті. Бұл туралы BBC Иран футбол федерациясының мәлімдемесіне сілтеме жасап хабарлады.

Иран футбол федерациясының президенті Мехди Тадждың айтуынша, ФИФА-ға 10 талаптан тұратын тізім жолданған. Тегеран өз делегациясының барлық мүшелеріне, соның ішінде Ислам революциясының сақшылар корпусында (ИРСК) қызмет еткен тұлғаларға визаның кедергісіз берілуін күтеді. Сондай-ақ Иран тарапы мемлекеттік нышандарға құрмет көрсетуді және әуежайларда, қонақ үйлер мен стадиондарда қауіпсіздік шараларын күшейтуді талап етіп отыр.

Бұл мәселе АҚШ пен Иран арасындағы саяси қайшылықтарға байланысты ушығып тұр. АҚШ Мемлекеттік хатшысы Марко Рубио ирандық футболшыларды қабылдауға дайын екенін, бірақ ИРСК-мен байланысы бар тұлғаларға шектеу қойылуы мүмкін екенін ескертті. Бұған дейін Мехди Тадждың өзіне ИРСК-мен байланысы бар деген күдікпен Канададағы ФИФА конгресіне виза берілмеген болатын.

Айта кетейік, бұған дейін АҚШ президенті Дональд Трамп Әлем чемпионатында Иранды Италия құрамасымен алмастыру туралы бастама көтерген еді. Алайда ФИФА президенті Джанни Инфантино Иранның турнирге қатысатынын қадап айтты. 2026 жылғы Әлем чемпионаты АҚШ, Мексика және Канадада өтеді. 11 маусымда басталатын турнирге алғаш рет 48 ұлттық құрама қатысады деп жоспарланған.