Иран Дубай, Доха және Манамаға тағы да соққы жасады

2 наурыз күні таңертең Иран Израиль мен Парсы шығанағы елдеріне қарсы жаңа зымыран соққыларын жасады. Reuters агенттігінің хабарлауынша, Дубай, Доха және Манама қалаларында жарылыстар естілген.

Израиль әскері Иран тарапынан ел аумағына қарай зымырандар ұшырылғанын мәлімдеді. Әуе қорғаныс жүйелері оларды тосқауылдауға кіріскен. Тұрғындарға мобильді хабарламалар арқылы шұғыл түрде жасырыну орындарына бару туралы ескерту жіберілген. Иерусалимде де әуе дабылынан кейін бірнеше жарылыс дыбысы естілгені хабарланды.

Кувейт астанасы маңында, АҚШ елшілігі орналасқан ауданда қара түтін көтерілген. Дипломатиялық миссия адамдарды ғимарат маңына жақындамауға және қауіпсіз жерге паналауға шақырды. Қаладағы тұрғын аудандарда да қатты жарылыстар естілген, билік мұны әуе қорғаныс жүйесінің ұшқышсыз аппараттарды жоюымен байланыстырды.

Ливанда да жағдай күрделене түсті. 2 наурыз күні таңертең Ливан аумағынан Израильдің солтүстігіне қарай зымырандар атылған. Шабуылға Иран қолдайтын «Хезболла» қозғалысы жауапкершілік алған. Бұған жауап ретінде Израиль Ливан аумағына соққы жасады. Ливан үкіметінің мәліметінше, 31 адам қаза тауып, 149 адам жараланған. Израиль армиясының солтүстік округі қолбасшысы Рафи Мило соққылар қарқыны артатынын мәлімдеді.

Бұған дейін АҚШ президенті Дональд Трамп Иранның жаңа басшылығы Вашингтонмен келіссөз бастауға ниетті екенін айтқан. Алайда Тегеран бұл ақпаратты жоққа шығарды. Иран Жоғары ұлттық қауіпсіздік кеңесінің бас хатшысы Әли Лариджани елдің АҚШ-пен келіссөз жүргізбейтінін мәлімдеді.

Дональд Трамп әскери операция тағы төрт аптаға дейін созылуы мүмкін екенін де жоққа шығармады.