ИНВЕСТИЦИЯ, БИЗНЕС ЖӘНЕ КАДР МӘСЕЛЕСІ: ШҚО-ДА 2026 ЖЫЛДЫҢ АЛҒАШҚЫ ІСКЕРЛІК КЕҢЕСІ ӨТТІ

Шығыс Қазақстан облысында 2026 жылғы алғашқы Іскерлік кеңес отырысы өтті. Өңір әкімдігі жанындағы бұл алаңда билік өкілдері мен кәсіпкерлер бас қосып, бизнесті дамытуға қатысты өзекті мәселелерді талқылады.

Жиынға «Атамекен» кәсіпкерлер палатасының өкілдері де қатысты. Кеңестің басты мақсаты – жеке мәселелерді емес, тұтас бизнес қауымдастықтың ұсыныстарын жүйелі түрде қарастыру.

ШҚО әкімі Нұрымбет Сақтағанов кәсіпкерлікті қолдау мен инвестиция тарту аймақ үшін негізгі басымдық болып қала беретінін атап өтті.

Отырыста өңірдің инвестициялық әлеуеті, мемлекеттік қолдау тетіктері, билік пен бизнес арасындағы әріптестік, сондай-ақ жұмысшы кадрлардың жетіспеушілігі сөз болды.

Сонымен қатар облыстың 2030 жылға дейінгі даму стратегиясы таныстырылды. Құжатта Өскеменді хаб-қала ретінде дамыту, шекара маңы аумақтарын күшейту, өнеркәсіп пен ауыл шаруашылығын жаңғырту, инфрақұрылым мен энергетиканы дамыту негізгі бағыттар ретінде белгіленген.

Бұдан бөлек логистика, газдандыру, туризм және жаңа индустриялар перспективалы салалар қатарында аталды.

Стратегияны іске асыру үшін арнайы орталық құрылып, нақты жол картасы әзірленбек.