Инфантино қатты сынға қарамастан ФИФА президенті лауазымында қалатын болды

Халықаралық футбол федерациясының (FIFA) президенті Джанни Инфантино қызметінде қалады. Мұндай шешім 5 тамызда Рабат қаласында өткен FIFA басқармасының шұғыл отырысында қабылданды.

FIFA таратқан мәлімдемеде ұйымның бас хатшысы Маттиас Графстрём мен басқарма мүшелері соңғы күндері сынға ұшыраған Инфантиноға қолдау білдіргені айтылған. Сондай-ақ федерация соңғы оқиғалардан сабақ алып, жұмыс үдерістерін жетілдіретінін мәлімдеді.

Бұдан бөлек, FIFA ұлттық және құрлықтық футбол қауымдастықтарына хат жолдап, даулы бастамаға байланысты жіберілген қателіктер үшін кешірім сұраған. Ұйым мұндай жағдайдың қайталануына жол бермеуге уәде берген.

Жанжал FIFA әлем чемпионаттары мен өзге де турнирлердің коммерциялық құқықтарының бір бөлігін жеке инвесторларға беру жоспарын жариялағаннан кейін туындады. Бұл бастамаға UEFA бастаған бірнеше футбол конфедерациясы қарсы шығып, Инфантиноны ашық сынға алды. UEFA ұйым басшылығы сенімнен айырылғанын мәлімдеп, жоспар жүзеге асса, FIFA турнирлеріне бойкот жариялайтынын ескерткен.

Қысым күшейгеннен кейін Инфантино 1 тамызда турнирлерді ішінара жекешелендіру жоспарынан бас тартатынын хабарлаған еді.