Иммунитетіңіз түсіп кетті ме? Енді жағдайыңызды AI-мен тексере аласыз

ImmuniGuide медициналық стартабы иммундық жүйенің жағдайын бағалайтын бірегей платформаны іске қосты. Бұл туралы Astana Hub хабарлады.

Отандық ғалымдар әзірлеген бұл инновациялық өнім онкологиялық клиникада сәтті қолданылып жатыр. Платформа жалпы қан анализіне негізделген иммунологиялық деректерді талдап, жасырын инфекцияларды анықтайды және иммунитетті нығайту үшін ұсынымдар береді.

Жобаның мақсаты – халыққа тегін әрі қолжетімді скрининг ұсыну. Платформа организмнің ауру-сырқауға, екпеге, физикалық жүктемелер мен стресске реакциясын бақылауға мүмкіндік береді.

"Ойымызда жобаның алғашқы ұшқыны пайда болған 2016 жылдан бері платформаны әзірлеуге 8 жылдан астам уақыт жұмсадық. Осы уақыт ішінде 4 авторлық құқық алып, сауда маркасын тіркеп қана қоймай, платформаның құрылымын қайта қарап, жасанды интеллект кіріктірдік. Биыл шілдеде өнімді өндіріске сәтті енгізіп, белсенді қолданып жатқан клиникалар мен емханаларда жақсы көрсеткіштер байқап отырмыз", – деді  Нұрлыбек Өдербаев, ImmuniGuide негізін тең қалаушы, медицина ғылымдарының докторы, дәрігер-онколог.

Жасанды интеллекті қолдану нәтижесінде медициналық деректерді өңдеу жылдамдығы мен дәлдігі жоғары деңгейде, нәтиже дәлдігі  – орта есеппен 98,7%.

Жоба шетел нарығына шығуға дайын, Малайзиямен келіссөздер жүріп жатыр. Болашақта Азия, Еуропа және АҚШ елдеріне кеңейту жоспарланып отыр.